Navigation – Plan du site
Textes

Version actualisée de 1476. Ms. O (BNM 1518)

Texte intégral

1Assi mesmo este noble rey don Enrrique, entre otras noblezas que fizo, fue que dexo dos enxiemplos muy prouechosos e muy buenos para los que an de seruir señores. El primero fue este : que, estando en Segouia, acaesçio quel infante don Ferrando, su hermano, el qual el mucho amaua, estando en palaçio atendiendo al rey quando se leuantasse, fuele dicho que se assentasse. E como non avia otro assentamiento sy non la silla del rey, la qual estaua aparejada en-el estrado para el rey, el infante, non mirando lo que fazia, asentosse en-ella. Estando assy assentado, a desora salio el rey de su camara e violo como estaua assentado, e fuesse para el, diziendo le muy malas palabras, entre las quales le dixo que nunca se assentasse en la silla de su rey. Entonçe, el rey mesmo tomo la sylla como estaua e lançola del alcaçar abaxo faza el rio, la qual se fizo mas de çinquenta pedaços. Esto fecho, boluiosse el rey para el ayo del infante, diziendole asas feas cosas, entre las quales le dixo que estaua en punto de lo echar en pos de la silla, por que avia consentido assentar al infante en ella.

  • 1 « le », rayé

2El segundo enxiemplo fue este : que este dicho infante don Ferrando dixo al rey, su ermano, que sy a-su alteza pluguiesse, que queria ordenar vn torneo o fiesta, e que1 suplicaua a-su señoria le quisiesse ayudar para el gasto que entendia fazer en aquella fiesta. El rey, oyda su petiçion, dixo que le plazia de-le ayudar. E el rey mando fazer vn libramiento de fasta veynte mill maravedis, e mando a-vn paje suyo del rey que lo leuasse al infante, su ermano, e que mirasse bien lo quel infante diria o faria quando le diesse el libramiento. El infante, como resçibio el libramiento, leyolo e, leydo, loo mucho al rey por la merçed que-le fazia en tanto grado que, assi como el paje boluio al rey e le conto todo lo quel infante le avia dicho e la merçed que le fazia, que otro dia, le mando enbiar el rey vn libramiento en mas de dozientas mill, e le dio çiertas villas e lugares donde los oviesse de renta en cada año.

[Don Juan II]

  • 2 « de Aragon » est suscrit dans O.

3Despues que murio este noble rey don Enrrique, alçaron los altos omnes del reyno por rey a su fijo, el infante don Juan, del qual beso las manos el infante don Ferrando, su tio, en nombre suyo e de todo el reyno. E como el infante don Juan era niño de fasta año e medio, quedo por tutora e curadora del rey e del regno la reyna doña Cathelina, su madre, la qual gouerno los reynos de Castilla en mucha paz e concordia. En este tienpo, seyendo el rey don Juan niño, murio el rey don Martin, rey de Aragon ; e la reyna doña Catelina, queriendo remunerar al infante don Ferrando la lealtad e fidelidat que tenia con el rey don Juan, su fijo, mando lo llamar e le dixo que, por quanto el rey don Martin de Aragon2 era muerto e a su fijo, el rey don Juan, e a-ella, pertenesçia el dicho reyno, quel rey e ella le fazian merçed del, e que ella le daria gente e dinero e lo que ouiesse menester para lo tomar. E el dicho infante don Ferrando resçibio la merçed que la señora reyna le fizo en nombre de su fijo, el rey don Juan, e suyo ; e poniendo lo luego por obra, fue rey de Aragon.

  • 3 Sic, pour María. Leonor (Éléonore) est la fille de Ferdinand qui a épousé le roi Edouard du Portuga (...)
  • 4 O : al
  • 5 De nouveau la même erreur : Leonor pour María.
  • 6 Lacune de O.

4Este muy catholico e muy noble rey don Juan, despues que salio de la tutoria de su madre, caso con doña Leonor3, fija deste rey de Aragon, el qual tenia quatro fijos e dos fijas : el primero fue el infante don Alfonsso, que suçedio por rey despues del padre ; el otro, el infante don Juan, que fue rey de Nauarra ; e [e]l4 infante don Enrrique, que fue maestre de Santiago ; e el infante don Pedro, que murio en-Gaeta ; e <a->la reyna de Portogal, que yaze en Santa Maria de Nieua. E este infante don Alfonsso que fue rey de Aragon caso con doña Leonor5, ermana del rey don Juan suso dicho, en-la qual nunca ouo fijo. Este fue rey de Napoles. Este noble rey don Juan ouo en-la reyna doña Leonor, su muge[r], al infante don Enrrique. E despues, murio la dicha doña Leonor, e caso con doña [...]6 del rey de Portogal, en la qual ouo vn fijo, que se llamo el infante don Alfonsso, e la fija, doña Ysabel.

5Este noble rey entro en-el reyno de Granada e talo la vega de Granada ; e salio a-el el rey de Granada con todo su poder e trauose la batalla, e fue vençido el rey de Granada, e muertos muy muchos moros ; en-espeçial, murieron açerca de vna figuera sobre quatro mill moros. Este bien auenturado rey vençio al rey de Nauarra e al infante don Enrrique açerca de Olmedo, e los echo fuera del reyno. En tiempo deste bien auenturado rey, gano el conde don Rodrigo Manrrique a Vesca de moros, e se ganaron otros logares muchos.

6Este noble rey mando matar a-don Aluaro de Luna, que fue maestre de Santiago e condestable de Castilla, por justiçia. Despues, murio en-el Avreojo, açerca de Valladolid, e yaze enterrado en-el monesterio de Miraflores, açerca de Burgos.

[Don Enrique IV]

  • 7 O : la rey
  • 8 En blanc dans O.

7Despues que murio el noble rey don Juan, alçaron los altos omnes del reyno al infante don Enrrique, su fijo, por rey, el qual fue casado con la fija del rey don Juan de Nauarra en vida de su padre, el rey don Juan, las quales bodas fueron fechas en Valladolid, presente el rey don Juan, su-padre del infante, e la reyna de Castilla, su madre, e presente el rey don Juan de Nauarra e la rey[na]7 doña Blanca de Nauarra, madre de doña [...]8, su muger del dicho rey don Enrrique, en-la qual non ouo fijos ningunos. E por esta causa, dispensso el papa con-el que pudiesse casar con otra e, sy oviesse fijos en ella, que fuesse avida por muger ; e sy non, que dentro en-tres años, que tornasse a-la primera. Asi que este rey don Enrrique, esto fecho, caso con doña Juana, sobrina del rey de Portogal ; e passados los tres años quel papa le dio, se dize aver vna fija en esta doña Juana. E como este noble rey don Enrrique non avia fijos, fizieron çiertos caualleros de Castilla con-el rey don Enrrique que su hermano, el infante don Alfonsso, fijo del rey don Juan, su padre, que fuesse resçebido por prinçipe heredero despues del ; e al rey don Enrrique plogo dello.

  • 9 « desto », rayé.
  • 10 En blanc dans O ; une main postérieure a complété le texte avec le prénom (Alonso) de l’archevêque.

8Despues9, non contentos desto, çiertos caualleros de Castilla con don [...]10 Carrillo, arçobispo de Toledo, ordenaron como fuesse dispuesto este rey don Enrrique, el qual fue dispuesto en esta manera : en Avila, mandaron fazer los caualleros vn cadahalsso de fusta, el qual estaua enparamentado de paños negros, en-el qual estaua vna estatua o figura del dicho rey don Enrrique assentado en vna silla, con vna corona de oro en-la cabeça, e con su espada çiñida, e con vn baston en-la mano. E aquellos caualleros que eran de aquella opinion de-lo disponer con el arçobispo todos presentes, el arçobispo le quito la corona de-la cabeça, otro le quito el espada, el otro, el baston de-la mano, e el otro lo derribo de-la silla. Esto assy fecho, leuantaron al infante don Alfonsso, su ermano, por rey asaz niño, pero non lo gozo, ca non plugo a Dios, que dende a poco tiempo murio, e quedo el rey don Enrrique por rey como primero. En este tiempo, fue rresçebida la infanta doña Ysabel por prinçesa de Castilla.

9En este tiempo, estando el rey en todas estas necçessidades, llamo a-todos los que-lo quisiessen seruir, que los faria fijos dalgo. E fuero[n] a este llamamiento al rreal de Symancas muchos por ganar esta esençion.

10Este bien auenturado rey entro antes que estas cosas le acaesçiessen con sus caualleros en-el reyno de Granada, en-el qual fizo muchos daños. En su tiempo, se gano Gibraltar de-los moros. Este bien auenturado rey se fue a-ver con-el rey de Françia a Fuente rrabia. Este gano del regno de Nauarra a la Guardia, e a Viana, e a-los Arcos, e a toda la merindat de Estella. En su tiempo deste, veno el conde de Fox de Françia, e tomo a Calahorra e la destruyo. Despues, vinieron los vezinos della e asoldadaron gentes, e vinieron sobre la çibdad, e ganaron la con ayuda del noble cauallero Juan Remirez de Arellano, el qual dio al señor Alfonsso de Arellano, su fijo, con toda su casa ; e assy, a sus dispenssas tornaron los vezinos de la dicha çibdad a-la corona real de Castilla e a-sus casas. Este noble rey murio en Segouia, e yaze enterrado en Sant Antonio de Segouia.

[Doña Isabel I]

  • 11 Dans la marge, le copiste a ajouté : fijo del rey don Juan que era [rey de] Aragon e de Nauarra.

11Despues que murio este noble rey don Enrrique, leuantaron los altos omnes de Castilla en Segouia por reyna a la infanta doña Ysabel, hermana del dicho rey don Enrrique de gloriosa memoria, e por rey al rey don Ferrando, que era rey de Çeçilia11, por quanto era casado con la dicha infanta doña Ysabel en vida del rey don Enrrique, su hermano.

  • 12 « de Castilla », rayé.
  • 13 Comme dans le cas précédent, la lacune de O a été complétée plus tard.
  • 14 Souscrit dans O.
  • 15 Sic, à la suite d’une lacune ponctuelle probable (mando ?).

12Esto assi fecho, leuantaronse çiertos caualleros de Castilla con doña Juana, que se dizia fija del rey don Enrrique, e dieron la al rey de Portogal por muger. E el rey de Portogal entro en Castilla con todo su poder, con ayuda de çiertos caual[l]eros de Castilla, e vino a-la çibdat de Toro, la qual le dio vn cauallero que se dizia Juan de Vlloa, que la tenia en guarda, el qual degollo despues este rey de Portogal ; e assy mesmo, ouo por tracto a-Çamora, que ge-la dio el alcayde. En este tiempo, el rey don-Fernando e la reyna doña Ysabel, su muger, llamaron a-los caualleros12 e fijos dalgo de Castilla. E vinieron todos al llamamiento, saluo aquellos que eran de-la opinion del rey de Portogal, con el qual era el arçobispo de Toledo, don [...]13 Carrillo, e otros. E llegada la gente, el rey don Ferrando partio14 de Valladolid e fue por dar batalla al rey de Portogal, e assento su real açerca de Toro, e lo aspero ally ocho dias en-el campo, pero non salio, por quanto dizia quel tenia çercada la fortaleza de Toro. E a esto le respondio el rey don Ferrando quel ge-la mandaria entregar con que saliesse a-la batalla. E desque vio el rey que non queria salir, partio de ay e fue sobre el castillo de Burgos, el qual se le avia reuelado, e estouo sobre el seys meses, pero al cabo tomo lo por pleytesya. Enpero, antes que se diesse el dicho castillo, sopo el rey don Ferrando como estaua el rey de Portogal e su muger e el arçobispo de Toledo con muchos grandes de su casa en Çamora. E partio de-Burgos e fue a Çamora, e entro dentro por tomar al rey de Portogal e a los que con-el estauan. E el rey de Portogal fuyo de noche para Toro. E fue ally desbaratado el rey de Portogal, e muertos e presos asaz de los suyos, e otros se le acogieron a-la fortaleza, en guarda de-la qual el rey poner15 muy gran recabdo.

  • 16 Dans O, le s final est suscrit.

13E estando el rey sobre ella, veno el rey de Portogal con su fijo, el prinçipe de Portogal, con asaz gente por socorrer al castillo. E el rey don Ferrando salio a-el con muy poca gente segun la quel rey de Portogal tenia, e desbaratolos, e mato e prendio sobre mill onbres, e el rey de Portogal e el prinçipe, su fijo, fueron fuyendo a Toro. E el rey don Ferrando quedo en-el campo fasta otro dia, e ouo el despojo e las16 vanderas de Portogal. En-este tiempo, el rey don Ferrando se llamo rey de Castilla e de Portogal.

14Esto acabado, el rey de Françia enbio sobre treynta mill conbatientes en socorro del rey de Portogal, non curando de-la hermandad que tenia con los reys de Castilla. E vinieron sobre Fuente rrabia e la sitiaron, e estouieron sobre ella por asaz tiempo, donde se fizieron grandes muertes e daños en los françeses. Estando los fechos de Fuente rrabia en-esta manera, veno el rey don Ferrando a Vitoria.

Haut de page

Notes

1 « le », rayé

2 « de Aragon » est suscrit dans O.

3 Sic, pour María. Leonor (Éléonore) est la fille de Ferdinand qui a épousé le roi Edouard du Portugal.

4 O : al

5 De nouveau la même erreur : Leonor pour María.

6 Lacune de O.

7 O : la rey

8 En blanc dans O.

9 « desto », rayé.

10 En blanc dans O ; une main postérieure a complété le texte avec le prénom (Alonso) de l’archevêque.

11 Dans la marge, le copiste a ajouté : fijo del rey don Juan que era [rey de] Aragon e de Nauarra.

12 « de Castilla », rayé.

13 Comme dans le cas précédent, la lacune de O a été complétée plus tard.

14 Souscrit dans O.

15 Sic, à la suite d’une lacune ponctuelle probable (mando ?).

16 Dans O, le s final est suscrit.

Haut de page

Pour citer cet article

Référence électronique

« Version actualisée de 1476. Ms. O (BNM 1518) », in Suma de Reyes du Despensero, Paris, CLEA (EA 4083) (Les Livres d’e-Spania « Sources », 4), 2013, [En ligne], Mis en ligne le 23 octobre 2012, consulté le 28 mars 2017. URL : http://e-spanialivres.revues.org/489

Haut de page